Avatar ka en ve

Ennawm ti ila a sual lovang chu maw, (nge movie emaw film kan ti deuh kher dawn) en hrat ve tak mai ka ni, kan \hianpa pakhat sawidan takah American nuam ti film (American romantic comedy) ka tuipui viau a, a nihloh chuan history nena chawhpawlh film te ka tuipui viau \hin, science fiction lam hi ka tuipui em em lova, mahse a lar zualte erawh hmaih bik ka tum ngai bik lo.
A dik taka sawi chuan James Cameron-a film thar ber The Avatar hi ka en chak lem lo, science fiction pawl deuh phut, indo nasa em em mai satliah ni ve leh mai turah ka ngai, internet lamah trailer te ka thlek ve lem luam a, 3-D version a awm hrang dawn tih thawmte ka hriat bawk avangin 3-D a en ve phak a ni dawn si lova, a nih tur ang a ni pha lovang tiin Twilight New Moon ka en chak zawkna chuan The Avatar chu eng teh ualah min ngaih tir lo ni ta berin ka hria. Ka lo rin lawk dan chuan kan khawvel a\anga sipai ralthuam \ha tak tak kengte'n planet danga thilnung dang chengve te an run ang a, an chak ang a, tichuan a tawp ang tiin ka lo ral rin ve ngawt a, trailer ka en a\anga ka rilrua lang chu James Cameron-a film hmasa ho, nang pawhin i hriat chian em em Terminator, Terminator 2, Aliens ang vel turah ka dah. Ka tui teh vak lo a ni ber!
Kan \hianpa leh kan thawhpui Dinagrafix buaipui tupa chuan a hmuhnawm a tihzia a sawi chiam a, mahse a ni hmuhnawm tih hi chu a thawnthu lam ai mahin video editing te, camera angle nalh te leh special effects lam te a nih daih \hin avangin ka rilru a ti then thui lem lo. Mahse an sawi ve sup sup a, Na'vi ho leh an vela thilnung dangte inlaichinna chungchang ril zia a sawi hnuah ka ngaihtuahna a ti dang ta riau a, a fiah fai \ha copy tur a awm reng tawh hnua ka copy duh tawh loh The Avatar chu ka'n copy ve leh hnuhnawh a.
Tualchhung chanchinbu zawng zawngah The Avatar chungchang ziahna a lang reng bawk a, khawvel puma sum a hailuh tam tawhzia te internet leh chanchinbu lamah kan hmu chamchi bawk nen, ka'n tuipui thar ve leh hnuhnawh ta a. Internet lam news te kan en kual a, Russia, China leh Europe khawmualpui ram zawng zawngah record thar a siam tihte ka hmu ta zel a, uluk taka en ve ngei a ngai a nih hi ka ti rilru a, zanrei tawh lam deuh ka chang a, uluk zetin ka inrem ve ta a.
Indo bur bur mai hmu chak lutuk lo chunga hmuh ngei lo beisei ka ni bawk a, ka rin ang a ni ta lo chiang kher mai. Trailer-ah lem inkap chiam chiam leh sava lian pui puia zawhte ang deuh deuh chuang leh helicopter danglam tak thlawk fur fur mai ka hmu si, mahse a film kalphung chu indona lam aiin indona duhlo lam a ni ta daih lawi, misual leh mifel indo satliah mai tura ka beiseina pawh a diklo chiang khawp mai. Khuarel kan tih mai, he khawvela Khuanu in kan awmpui, kan chenpui tura ransa, thing leh maute a dahte leh mihring inlaichinna chhiat tawhzia ka ngaihtuah a, Na'vi ho nun dan ka hmuh chuan ka ngaihtuahna pawh a ti kal thui kher mai, ka suangtuahnain anmahni Siamtu an ti lungawi awm bik mang tak e aw ka ti a, mahse lemchan mai a ni lawi si.
He film thawnthu hi kum 15 kaltaa James Cameron-a'n a ziah a ni a, kan tunlai khawvel nena a inmil dan ka'n ngaihtuahin khawvela film siamtu ropui ber pawla sawi nge nge a ngaihtuahna a ropui danglam hle.
Han ngaihtuah ve chhin mah teh, Resources Development Administration chuan an sumdawnna thlazar hnuaia sum invest te hlawkna tur zawngin mineral hlu em em mai unobtanium (KG 1 dollar maktaduai 20 man) neih dan kawng mi ramah an zawng a, para-military force thuam \hat zet mai hmangin chu mineral awmna mipuite chu nuai hrep mai a tum a, tharum thawh hmain an rilru sukthlek tih danglam sak a, a thluak suk a tum a, an nunphung lo neih ve te chu engahmah a ngai lova, an tum ber chu company hlawkna a ni. Hei hi The Avatar film kalphung a ni, heti zawng hian han ngaihtuah ve chhin teh - Resource Development Administration hi United States-a oil haichhuaktu company Halliburton/KBR, Vice President hlui Dick Cheney-a company peng ah ngai ta ila. Unobtanium hi The Avatar-a Na'vi ho chenna planet Pandora-ah an hmu a, Pandora hi Iraq emaw Afghanistan-ah ngai ta bawk ila, he film-a RDA hovin dim hauh lova Na'vi chenna thingkung pui ber an suasam hmiah ang khan Iraq-ah pawh para-military force chak zet mai Blackwater an tihte khan tualchhung mite nunphung zahna nei miah lovin an tihdanglam sak kha. An thluak an suk sak a, venhimna leh sum tam tak pe anga lang siin an nihphung hloh \hakin an siam a, chutianga an chetdan chu - demeaned emaw depersonalised tiin an sawi nghe nghe kha!
The Avatar film-a para military force mi leh sate zingah hian achangtupa Jake-a chu a telve ngei mai, mahse midang aia a luh thuk tak bik avang leh Na'vi nunze mawi em em leh Nature nena an inzawmna ril em em mai a hmuh chuan ngaihtuahna dang a neih tir a, an nunzia zir tura kal chu an nunzia ah chuan a lut nghet ve ta a ni.
Para-military force member dangte chuan an chhia leh \ha hriatna hmang mumal thei lo khawpin an hnaa chiang tura fuih an nih angin rawng takin an che a, ngaihtuahna fim hmanga an tih theih loh tur chu sum duhnain a ti khawlo a, mahse an zinga pakhat Jake-a erawh chu suma lei theih a ni ve ta lo, a kawnga chin hnuailam zeng tawh, a company thawhnain siam \hat sak leh an tiamna pawh chu a kalsan ta zawk a ni.
Ngaihtuahna a ti kal thui phian, tunlai khawvel thlir ila, indona thawm hriat tur a awm reng, TV news-a kan hmuh piah lamah heng indona te hian sumdawng pawl lian remchang a siam zel a, ka sawi tawh ang deuhvin War on Terror chu Halliburton te'n an hausak pui thur thur a, Iraq-in chemical ralthuam a nei e an ti a, an do chiam a, mahse far khat pawh an hmu leh lawi si lo, bin Laden-a an do a, amah an that hauh lo, mahse Afghanistan tuialhthei sumdawnna lian zawng zawng chu United States of America sumdawng liante kutah a awm vek tawh!
Avatar hi chi khat emaw thlah khat zinga danglam bik, diknaa kal thei tura hun harsa pawha mahni chhia leh \ha hriatna hmang thei tura duan bik ang tluka ngaih an ni. Khawvela sakhaw hrang hrangin Avatar kan nei ti ila a sual lovang, Bible pawh en ila, Nova, Abrahama, Mosia, Isua te kan nei, chutiang bawkin sakhaw dang pawhin Zoroaster, Rama, Sita, Krishna, Buddha, Mohammed, Fatimah te an nei ve bawk. An chungchang ziahna lehkhabu tam tak a awm a, chu'ngte chu kan sakhaw bute an ni a, a \hente chu Pathian biakin kan bia a, a \hente chu sakhaw khat vuantute tan mi thianghlim te an ni. An chanchin kan chhiar am, kan zir a, diknaa kan din theihna tura entawn tur min siamsaktu leh kawng min kawhhmuhtu an ni. Ka thlarau nun hi kan lei nun nena danglam em em thei lo, he leia kan awm laia kan nun dan a zira kan chan ve tur a ni tih min kawhhmuhtute an ni, kan rindan leh kan rina te erawh a danglam tih mai a ni.
The Avatar-ah pawh avatar tak Jake-a ah hian kan hmu, Na'vi chi pawh ni ve lo a ni nachungin amah hian Na'vi ho chu ama avatar-ah a ngai a, a thilhmuh a\anga ama chhia leh \ha hriatna rawn inpuangchhuak dikna nia a hriatna zawna huaisen taka a kal ngamna chuan Na'vi ho tana avatar nihna dinhmunah a hlang thung.
Dikna a kalpui mai piah lamah he film hian mihringte nihphung tur dik tak zawk min kawhhmuh ni tein ka hre ve. Mihringte hi hausakna leh nawmna tur uma hmasawn zel tura duan kan ni ti ila ka sawisual kher lovang, kan hmasawnnain a \ha lamah nasa takin min hruai a, chutih rualin kan hmasawnna hian he khawvela kan chenpui thilnung dangte nasa takin kan diriam a, kan umchep a, an tana chen ve tlaklohna hmunah kan khawvel in\awm hi kan siam a ni.
A thuchah ken pakhat rilru khawih em em leh Mizoram mipuite pawhin kan zirchhuah ngei atana ka awh em em chu Nature pawimawhzia lanchhuahna kha a ni. Achangtupa Jake Sully khan Na'vi hi chenna planet Pandora-ah ama species pui phatsan a tum hauh lo, mahse Pandora-a mi nung cheng ve te leh Nature inhnimhnaih dan leh inchawmtawnna an nun dan a hmuh khan kan hmuh apiang kan nawmsakna tura suat mai mai \hin mihring zawk kha a phatsan a, Na'vi ang ni ve duh hial khawpin a rilru a thlak danglam a ni.
Pandora-ah chuan thilnung engkim mai chu an inzawm thei vek a, Na'vi ho chuan an sam hmawr hmangin an chhehvela thilnung dang awmve te chu an zawm a, an rilru \awnpui chungin an duh dan angin an hmang \hin. Thilnung engkim mai chu zah takin anmahni ang tlukin an en a, a \ul hunah an hmang a, thawklehkhata hausak thut nan emaw, nawmsak thut nan an chhehvela thilnung dangte chu an hmang ve lo, a chhan chu thilnung engkim mai chu inring tawn veka nung thei chauh an ni tih an hriat chian avang leh an thil hriatchian a chu a taka an zawm tlat avangin.
Vawikhat nawmsak emaw, hausak thut na tur hian mihringte hian kan chhehvela thil hlu awm, a awm chhan leh an lo awm ve avanga inchawmtawn tur kan nihna zawk chu hrereng chungin kan haider a, kan khawvel hi kan suasam chhe mek a ni. Mizoram ngei pawh chhut ila, kan thing leh mau kan suasam nasat luat avangin hmanlai a\anga kan kum chhiar ve dan \hin, fur, thlasik, favang tihte chu \awngkam satliah mai an ni tawh, kan pi leh pute'n calender tel hauh lova kum khat chhunga sik leh sa inthlak danglam hun tur an lo hriatlawk theih \hin te kha tunah chuan a danglam vek tawh, Climate Change tia uar zet maia khawvelin a sawi \hin hi United States bika thleng tur a ni lo, kan ramah ngei pawh a thleng mek a ni. Pawldelh ruah, \o haw hun te hi ala dik reng em? Mahni inzawt ila a chiang viau ang!

'\' should be read as 'tr'